Nokkur kvæði

Vöxtur lamba og verðbréfa:

Verðbréfanna vöxt af stað
vorburðurinn gerði.
Hluta-féð að hausti það
hríðfellur í verði.

Vorstemming:

Stundir bæta skemmta skúf,
skreyttar kríur fljúga.
Grundir hoppa leikin ljúf,
lömbin júgrin sjúga.

Þetta má lesa afturábak enda sléttubönd.

Bjartsýni:

Fínn er dagur, fagur mjög,
fögnum vorsins skímu.
Syngjum bráðum sumarlög
og semjum góða rímu.

Haust að vori

Snælduvitlaust snjóar hér,
snúðug er vorsins glenna.
Grillið svölum útá er,
og í kaf mun fenna.

Vorið það er vitsins laust,
vindur raddbönd þandi.
Snemma núna hlær nú haust,
hryssingslegur fjandi.

Bakvið haust við blasir vor,
brátt því eykst hér kraftur.
Með ljúfur tónum léttast spor,
er lóan syngur aftur.

Andinn og holdið

Nærbuxnaleysi er nýljóðum merkara,
í næturhúmi.
Upprisa holdsins er andanum sterkara,
upp í rúmi.

Nakið holdið nærir andann
í næturhúmi
vaknar þráin, vekur landann
í vatnsins rúmi

Vorvísa

Grænkar soldið grassins strá
gróðurfoldin loðna.
Ilmur moldar eykur þrá
aftur holdin roðna.

Páskadagur

Súkkulað-og svitadrómi
sælukliður,
tæmast diskar, terturjómi
tútnar kviður

Umferðin

Snjór og bleyta, bílar hreyta,
bikið reita, tjöru fleyta.
Ruslið þeyta, rúður skreyta,
ruma þreyta, hnefum steyta.

Fer ekki bráðum að vora?

Þegar hylur hríðin svört
og hrekjast ylir sannir
senn þá mylur sólin björt
og sundur skilur fannir.

Surtsey

Uppúr gúli eyjan hrökk,
ógnarspúlið jarðar.
Gufusúlan surta dökk
svifu kúlur harðar.

Án titils

Fallegt er faglegt,
feykn er það gott,
ljúft er og laglegt,
ljómandi flott.

Grýlukerti

Grýlukertis klakavax,
klæða núna húsið.
Niður vaxa, neðan þaks,
nota má í djúsið.