Lækjarsitra

Í sólarbrækju þornar þrá
þaraflækjur glitra.
Um fjörustækju flæðir hjá
fjörug lækjarsitra.

Skæð er norðanáttin

Skæð er norðanáttin ör,
ýfir borðið sjávar,
hylur sporð og hindrar för,
hrærir skorður gráar.

Æstur Kári

Ýfir báru, belgir kvið,
blæs upp fjára, glæstur.
Lætur gárast lúðumið
ljóti Kári æstur.

Hálmstráin

Nú skuldir fölna, fögnum því
sem fló á vorsins gæru.
En hálmstrá sölnuð hanga í
við hreinsun fors af æru.

„Grýla gamla er loksins dauð“

Andleysið

Af norðri herðir hríðin enn
heggur sverð af þunga.
Illa gerður endar senn
er andlaust verður lunga.

Rokið

Rokið skellur rammt af þrá
ryðst með hvelli'og asa.
Skríður, gellur, skoppar hjá
úr skýjum hellist flasa.

Beinaber

Í hríð og sagga hungrið sker
mót hreti gaggar tófa.
Í rjúpu þaggar beinaber
breitt þá vaggar rófa.

Á bárum kröppum

Fuku tárin toppi af
tær af gárum knöppum.
Ljúft í fjára fugl samt svaf
fýll á bárum kröppum.

Við Flóann

Gutlar Eyjan gul á brá
glymur tregi kletta.
Flekkótt þegja fjöllin há
við Flóann spegilslétta.

Skrár tengdar þessari bloggfærslu:

• grimsey.pdf

Þaraflóin

Lognið dró um loftið slóð
lykt af sjó og þara.
Þæg á klóarþangi stóð
þaraflóin - Klara.