Maríuerlan

Mild á ferli mætt á fund
maríerlan hoppar.
Læðist kerla, létt um grund
lítil perla skoppar.

Dropótt kind

Þó að berji blástur tind
brimið skerin mái
drekkur sérhver dropótt kind
dögg af hverju strái

Leðjudrulla

26.2.2013 (gleymdi að setja þetta inn í gær)

Niður bullar bleytan stríð
berg á fullu skoppar.
Leðjudrullan litar hlíð
líkt og sullist koppar.

Kolsvört fljót

Kolsvört fljótin kastast til
krafsa grjót úr bökkum,
hlíðar róta rispa gil,
rífa'úr gjótum dökkum.

Kristin gildi

Suma gleður girnd, og þrá
að græða, ljúga og stela.
Kristnu gildin kristalblá
kannski er best að fela.

Tvær tengdar hringhendur

23. feb 2013

Róum svörtum sjónum á,
sjávarhjörtinn dólum,
yfir kvörtum, einatt þá
alltof björtum sólum.

24. feb 2013

Þegar gjólan gerir hlé,
gárubólur titra,
hafs á kjólum hundrað sé,
hlýjar sólir glitra.

Bálhvasst

Vindur strýkur bröndótt bak,
báru fýkur eldur.
Öldubríka brennt er þak
blágrár rýkur feldur.

Gróft

Rjúka hviður rúðu á
regnsins kliður mæðir.
Alveg niður grund og gjá
grófa skriðan æðir.

Kosningar

Um það dæmir fjölsögð frétt,
og flestöll gögn,
að allir kjósa alltaf rétt,
að eigin sögn.

Undan hvítri hulu...

Klént nú bítur kaldur ís,
klakinn þrýtur magur.
Undan hvítri hulu rís,
hundaskítur fagur.