Ofnbakaður pastasósufiskur

Hér er einföld uppskrift að rétt sem ég mallaði þegar ég nennti ekki út í búð að versla hráefni (átti þetta allt til í ískáp og frysti), uppskriftin ætti að vera nóg fyrir sirka 2-3.

Hráefni:
2-3 ýsuflök (fer eftir stærð flakanna, má eflaust vera þorskur sem mér finnst persónulega betri fiskur).
Pastasósa úr dós (skiptir örugglega engu máli hvernig sósa, allt eftir smekk)
Hrísgrjón
Ostur

Meðlæti, allt eftir smekk. t.d. kartöflur, hvítlauksbrauð, pasta, grænmeti.

Sjóða hrísgrjón (rúmlega botnfylli í eldfast mót), skera fiskinn í bita og setja ofan á, dreifa pastasósunni yfir og ost ofan á. Baka í ofni við 180-200 gráður í sirka hálftíma.

Þetta er enginn þurr fúll lax
þetta er fínt á diskinn.
Piltur! Kona! Prófið strax
pastasósufiskinn.

Kjötsúpa

Hér kemur uppskrift að kjötsúpu, ekki nákvæm en þó nokkuð nærri lagi.

Uppskrift fyrir tvo í þrjár-fjórar máltíðir (því súpan er best eftir svona tvær upphitanir).

Hráefni:
8 súpukjötsbitar (helst stórir, feitir og góðir)
Salt (eftir smekk)
2 rófur
Einn poki gulrætur (sirka 8-10 stk)
8 kartöflur
Hálft hvítkálshöfuð (notaði óvart eitthvað annað kál og það kom ekki að sök)
Einn lófi súpujurtir
Einn lófi hrísgrjón.

Kjötið sett í stóran pott og vatn sett í rétt yfir kjötbitana. Látið suðuna koma upp, setjið slatta af salti og takið tímann. Skerið niður grænmetið, flysjið kartöflurnar og setjið síðan allt út í eftir sirka hálftíma. Eftir sirka klukkutíma er kjötsúpan tilbúin. Nammi namm.

Sjóddu oftar súpuket,
svaka góður réttur,
grænmeti í gumsið set,
gott þú verður mettur.

Vöflur

Í gær gerði ég vöflur, fékk uppskrift frá Mömmu. Hún þurfti þó að hræra deigið í huganum því hún átti það ekki niðurskrifað.

En svona var það:
5 bollar hveiti
1/2 bolli sykur
1 matskeið vanilludropa (ég minnkaði það í 2 teskeiðar reyndar).
1 teskeið matarsódi
1 teskeið ger
200 g smjörlíki
2-3 egg (ég hafði þau 3)
Mjólk

Smjörlíkið brætt, allt blandað saman og hrært. Mjólkin er notuð til að ákvarða þykktina, spurning með að setja 1-2 bolla fyrst svo hægt sé að hræra og bæta svo smávegis við þar til þykktin er góð fyrir vöflur. Ef of mikil mjólk er sett þá er komið pönnukökudeig.

Líklega er þetta deig miðað við 10 manns.

Sykur hveiti líkisljómi,
látt í mjólk og egg
Sætar vöflur, sulta, rjómi,
sest hann í þitt skegg.

Djúsí pasta

Hérna er einn góður pastaréttur.

Hráefni fyrir 2-3 myndi ég áætla, tekur um korter að framreiða.
Pasta slaufur (300 g)
Beikonsmurostur (tæp dolla)
Rjómi (1/4 lítri)
Rauð Paprika pulsur (5 stykki)
pepperoni (hálft bréf)
skinka (hálft bréf)

Pastað soðið og pannan eða potturinn hitaður.
Paprikan, pylsurnar, pepperoníið og skinkan eru skorin í bita.
Pylsurnar steiktar á pönnu í smá stund einar, skinkunni og pepperoní bætt útí, steikt í smá stund síðan er beikonostinum bætt út í og hann látinn bráðna.
Rjómanum bætt við og loks er paprikan sett útí.

Þessu er svo blandað saman við pastað.
Líklega væri fínt að hafa hvítlauksbrauð með þessu, gleymdi að kaupa, en fínt samt.

Pastasullið pulsubland,
Pepperóní, rjómaslettu
Paprika og pottabrand,
passlega á diskinn settu.

Lofoten-fiskur

Það lá beinast við eftir að hafa veitt, slægt og flakað veiði helgarinnar að elda hana og ég vissi upp á hár hvaða uppskrift skildi verða fyrir valinu - Lofoten ofnbakaður fiskur (uppskrift sem ég hannaði sjálfur, þó sósan sé vissulega uppfinning einhvers annars. Sjúklega gott að mínu mati.

Hráefni:
Fiskur (þorskur/ýsa - aðrar fisktegundir hljóta að virka líka).
Brokkolí (líklega fínt að hafa papriku, blaðlauk, sveppi eða eitthvað slíkt eftir smekk).
Lofoten sósa (frá Toro).
Ostur.

Meðlæti:
Kartöflur og salat (blandað salat með olíulögðum fetaost er kjörið).

Ef búið er að flaka og roðfletta fiskinn þá tekur þessi réttur um það bil jafn langan tíma og kartöflurnar að sjóða (25-30 mín).
Meðan verið er að sjóða kartöflurnar þá er ofninn hitaður (180 gráður) og sósan hituð (uppskrift á pakka) og fiskurinn og brokkolíið skorið niður.
Síðan er náð í ofnfast mót og þunnt lag af sósu sett á botninn, fiskur ofan á það og brokkólí ofan á það. Endurtekið þar til efnið klárast. Lag eftir lag þar til fiskur, sósa og brokkólí er búið.
Ostur er síðan rifin niður eða skorinn og dreifður efst á fiskinn.
Bakað í ofni í um 20.
Á meðan kartöflurnar sjóða og fiskurinn er að bakast er góð hugmynd að nota tímann til að gera salat, leggja á borðið og slíkt.

Voila - geðveikt góður fiskréttur er tilbúinn.

Hafir náð í hetjufisk,
-heilnæmt mataræði.
Lófóten ég legg á disk,
ljúffengt guðafæði.

Steiktur fiskur

Hér er ein einföld uppskrift af pönnusteiktum fiski, einn af mínum uppáhaldsréttum.

Hráefni (fyrir 2):
Fiskur, tvö lítil flök eða eitt stórt (þorskur og ýsa finnst mér best, lúða og annað ætti þó að sleppa).
Tvö stór egg.
Mjólk.
Rasp.
Krydd (karrí, fiskikrydd eða aromat).
Salt.
Smjör.

Meðhöndlun:
Skerð flökin niður í sirka 5*5 sentimetra bita.
Brýtur egg í skál, og setur smá slatta af mjólk útí, þeytir saman.
Í aðra skál seturðu rasp og krydd að eigin vali (karrí finnst mér best) og salt, blandar vel.
Bræðir smjör á pönnu við meðalhita.
Veltir fiskinum upp úr eggjahrærunni, veltir honum síðan upp úr raspblöndunni og setur á pönnuna.
Ætti að steikjast þokkalega á nokkrum mínútum (10 mín).

Meðlæti:
Kartöflur og hrásalat.
Gott er að byrja að sjóða kartöflurnar fyrst, því það tekur lengri tíma en hitt.
Einnig er gott að steikja lauk á pönnu til að hafa sem meðlæti.
Sumir vilja kokkteilsósu, en það á að vera óþarfi.

Stenst ég aldrei steiktan fisk,
stælir bragðsins lauka.
Kartöflur og dót á disk,
drauminn minn mun auka.

Ommuletta

Í Ommulettuna notaði ég:
5 egg
smávegis mjólk
tvær brauðsneiðar
smjör
hálfur laukur,
nokkrir sveppir,
1/3 blaðlaukstilkur
og 1 sellerístilkur.

Steikti laukinn, sveppina, blaðlaukinn og sellerí á pönnu upp úr smjöri.
Reif brauðið niður í 3*3 sentimetra bita og dreifði yfir grænmetið á pönnunni.
Handhrærði eggin og bætti smá mjólk út í til að þynna.
Dreifði því yfir grænmetið og brauðið og steikti báðum megin.

Þess ber að geta að í staðin fyrir grænmetið sem er minnst á hér að ofan, má nota annars konar grænmeti eða jafnvel kjöt eins og skinku, hangikjöt, pepperóni eða beikon sem dæmi.

Ommulettan er mjög góð
elduð, steikt og mölluð.
Prýðileg á pönnuglóð
passlega þá brölluð.

Heit brauðterta

Mamma kenndi mér að gera heita brauðtertu um daginn, nú er að sjá hvort ég muni hvernig ég gerði hana og mamma.

Hráefni: Miðast við stórt eldfast mót.
Brauð
Majónes (stór dolla)
Sýrður rjómi (hálf dolla)
Skinka (eitt stórt bréf, skorið niður)
Niðursoðinn aspas (ein dós)
Niðursoðið ananaskurl eða sveppir fyrir þá sem borða ekki ananas (ein stór dós eða tvær litlar)
Ostur

Meðhöndlun:
Mælt er með að brauðtertan sé búinn til nokkuð áður en hún er hituð til að brauðið nái að blotna.

Sullið:
Majónes, sýrður rjómi, niðurskorin skinka, bleytulaus aspasinn og ananaskurlið blandað og hrært saman.
Smávegis af ananassafanum sett út í til að sullið verði nógu blautt.
Brauðið rifið niður og sett á botninn á eldföstu móti.
Eitt lag af sulli smurt ofan á brauðið, brauð ofan á það, sull þar ofaná og svo koll af kolli þar til sullið er búið, endað á sullinu.
Ostur sneiddur og settur efst til að þekja.

Ofninn er síðan forhitaður upp í 180 gráður ef ég man rétt og svona hálftíma áður en á að fara að borða brauðtertuna þá er hún sett inn.
Hituð þar til ostur er orðinn brúnn.

Brauðtertan er bragðgóð mjög
bestur kokkur vertu.
Brauð og sullið set í lög
sjóðheit borðið tertu.

Lifrarbuff

Ég get ekki orða bundist, fyrir algjöra tilviljun (var að leita að uppskrift fyrir brauðsúpu) þá rakst ég á frábæra heimasíðu, sem heitir CookbookWiki og hvað haldiði að ég hafi fundið, jú uppáhaldsréttinn minn (og Önnu Heiðu systur), nefnilega Lifrarbuff. Þetta er þó líklega ekki nákvæmlega eins og uppskriftin hennar mömmu, en ég ætla að prófa þetta einhvern tíman.

Ég ætla hér með að þýða uppskriftina yfir á íslensku (furðulegt að þýða íslenska uppskrift yfir á íslensku):

Innihald:
500 gr. lambalifur
1/2 - 1 bolli hveiti
1 stykki egg
3 stykki hráar kartöflur
1/2 - 1 bolli mjólk
2 laukar (mamma notar ekki lauk held ég?)
1/2 teskeið matarsódi (e. baking powder, er það það sama?)
salt, pipar og krydd að eigin smekk

Fjarlægja allar himnur og æðar úr lifrinni og skræla kartöflurnar.
Skera niður laukinn, gróft.
Hakka saman lifrina, kartöflurnar og laukinn.
Blanda saman við hveitið, matarsódann og krydd.
Egg bætt út í.
Þynna blönduna með mjólk, þar til það lítur ógeðslega út.
Steikja báðum megin á heitri pönnu (um ein matskeið í hvert buff).

Berist fram með steiktum lauk, kartöflumúss, grænum baunum og rabbarbarasultu.
Spæld egg eru líka góð með réttinum. Mmmmm, hlakka til að prófa þetta einvhern tíman :)

Steiktur laukur, lifrabuff,
ljúfa baunin græna,
mússið besta, bætir stuff,
og barbasultan væna.

Plokkfiskur

Ég eldaði plokkfisk um daginn, venjulega er hann gerður úr fiskafgöngum, en ekki átti ég neina afganga.
Ég sauð því þorsk og kartöflur.
Síðan tók ég fram stóra pottinn, bræddi slatta af smjöri í pottinum, hrærði hveiti út í, bætti við slatta af mjólk.
Þorskur, kartöflur, laukur, salt og pipar sett út í og látið malla.
Plokkfiskur tilbúinn. Ég fór að einhverju leiti eftir uppskriftum sem ég fékk á netinu.

Prýðilegur plokkfiskur
með pipar lauk og sósu
kartöflum og kúfdiskur
kokgleypti ég fullfrískur