Nokkrar vísur 2004-2005

2005

Ein fyrir haustið.

Gæsaskotin grípum við
gæsir sjáum fleygar
Skotin fljúga skjótum kvið
skjálfa gæsir feigar
(6. september 2005)

Hamingjudagar Hólmvíkinga:

Saurbæingar sýt'ei meir
og syngja út um haga
feykilega fagna þeir
að fá loks hamingjudaga
(13 maí 2005)  

Hákarlajarl

Bjarni frændi búbót fær
á bátnum aldinn jarl.
Glaður miðin garpur rær
og grípur þar hákarl
(6 maí 2005)

Hafísinn:
 
Kælir fjandi, kuldaband
kastar strandir frera
Mikill vandi veðrabarnd
vá að landi bera
(14 mars 2005)  

Mokfiskerí:
Vegna frétta um gott fiskerí hjá pabba gamla og Gumma datt mér í hug þessi:

Á Stefnir litl'í velt'og vagg
vaknar fiskiþula
Naskir Gumm'og Nonni Magg
að ná í þorskinn gula.

Nonn'og Gummi göslast tveir
gamlir krókar sukku.
Harða bjúgu háma þeir
held ég sé til lukku.

Taka bauju týnast inn
tugir þorsk'í móki.
þrammar inn þá þorskaskinn
þarn'á hverjum króki.

Fyllist trilla fagna menn
faðminn breiðir Góa.
Góða veiðin gerist enn
á góðum miðum Flóa.
(1 mars 2005)  

Vísa:

Fuglasöngur ferðin löng
fjallagöngur, valur
Áfram klöngur upp á spöng
aftur þröngur dalur
(14 feb 2005)  

Þorrablót:

Drykkjuveisla, matarmoð
mikil gleði, ábót.
Kæstur hákarl, rifið roð
rosalegt þorrablót.
(7 feb 2005)  

Hrafnaþing

Hrímkalt er og hvít er jörð
hrafnar mikið þinga
Líða þeir um landsins gjörð
loftið ákaft hringa
(18 jan 2005)  

Árið 2004

Svika árið sveif hér frá
svart var það og myglað
Dabbi hefur dansað hjá
og djöflavinum hyglað
(6 jan 2005)  

 

2004

Jólabelgur 

Iðrabelgur ógnarstór
eftir helgidaga
Ákaft svelgur berg'á bjór
á bjórsins felgu naga
(30 des 2004)  

Jólaminning

Um jólin snemma vöknum við
von er það hjá krökkum
Laumumst við af lúmskum sið
ljúfar kökur smökkum

Í náttfötum í næði tvö
nálægt jólarósum
Um Adam gamla'og syni sjö
sungum böðuð ljósum

Gervitréð var glæst og fínt
grafið í skrautsins bitum
Kúlur höfðum tréð á týnt
í trilljón fögrum litum

Mjúka pakka man víst grey
marga fékk ég slíka
Jólaköttur kom því ei
kveið ég honum líka

Bókin var hin besta gjöf
barbí heillar systur
opnar pakka engin töf
örlítið var hristur

Ný var Lukku Láka bók
las í sæluvímu
Fengum bæði flösku'af kók
og fína mandarínu
(21 des 2004)  

Vor

Ilmur vorsins vekur trú
vakna lífsins straumar
þiðnar hugans heilabú
horfnir vakna draumar

Vekur okkur vorsins sól
vinir heim þá fljúga
leika kát um lund og hól
lömbin spena sjúga

Fuglasöngur hljómar hátt
hafið vaknar líka
selur dólar sundið blátt
syndir milli víka

Hlýir vindar verma kinn
vetur burtu feykja
síld á fjörðinn sækja inn
sól nú blómin sleikja
(16 des 2004)  

Skvett úr skinnsokknum

Bræðir klaka, bætir fold
barnið eftir hermir
bleytir gjarnan gróðurmold
góður skammur vermir
(10 des 2004)  

Fullveldið

Desember þann fyrsta fékk
fullveldið lítil smáþjóð
Kostaði það felur og frelsis hlekk
framsókn- og íhaldsviðbjóð
(1 des 2004)

Ljósadýrð

Lýsa núna ljósin björt
langa myrka daga
Húsin núna skrýða skört
skammdaga mun laga
(29 nóv 2004)

Vetrarharkan

Vetrar harkan veikir dug
visinn sparka löngum
Kuldann slarkar, slær á hug
slef í barkans göngum
(22 nóv 2004)

Ætlaði að semja eina vísu handa Ömmu þegar ég var í heimsókn hjá henni síðast, kláraði hana þó ekki fyrr en ég var kominn heim:

Amma hún er létt í lund
með lopa oft hún prjónar.
Fim hún er við fingradund
og fögur lög hún tónar

Fann poka með kvenmannsnærfötum í bílnum mínum. Þá datt mér í hug þessi vísa:

Gamall drengur finnur feng
Fagran þvenginn kona
Brjósta streng'í stend í keng
Stoltur geng sísona

Hornstrandaferð í júlí 2004
Ég, Hersir, Carola og Rob fórum í Hornstrandaferð í júlí. Sumar vísurnar í þeirri ferð sömdum við Hersir saman:

Bjössi og Valka voru frábærir gestgjafar og þessa vísu settum við í gestabókina:

Í Norðurfirði fengum við
fínar mótsins tökur
Á því verður einhver bið
ég yrki góðar stökur

Fórum síðan með Sundhana til Reykjafjarðar og fengum fínar kökur, þó þær væru útrunnar :)

Siglingin með Sundhana
sjaldan myndatökur
fáa sáum fuglana
fengum útrunnar kökur

Mikið um kríur í Reykjarfirði:

Kríur okkur kroppuðu
kerlingar við vorum
stáltaugar ei stoppuðu
staulast ei við þorum

Á leið upp á Hrollleifsborg urðu til tvær vísur, önnur á ensku:

To Reykjarfjörður Robert went
riding chicks in his dream
They were very big and bent
best of all, they all did scream

Hrolleifsborgin hroðaleg
hræðist hana eigi
varla er hún voðaleg
víst ég ei mig beygi

Hrúturinn hans Heiðars, vorið 2004

Útí Grímsey gengu sjálfala rollur og héldu menn að kindin hans Heiðars væri rolla, svo var nú ekki.

Í Grímsey var ein golsótt ær
gerðist kynskiptingur
var ei lengur lambamær
lifnar typpalingur

Í Grímsey var ein golsótt mær
Gasalega nefstór
þetta var svo einstök ær
eiðinn Heiðar það sór

Rám hún jarmar, rekur við
rymur er fjölgar kindum
hnusar undir ærakvið
útaf mönnum blindum

Hávaðinn úr kaffistofunni var að ergja mig:

Heyri ég nú gaura garg
gesthvæm kaffistofa
finnst mér eins og fuglabjarg
fyllist ég af dofa

Enga fuglafræði kann
ferli ats og stofna
tuðið langan tíma spann
tímastundir rofna

Atferlið nú ergir mig
ekki mun það linna
margir lengi mata sig
minnkar æ hér vinna

Gerist fuglagargið hátt
gestir enn inn ramba
ríkisstarfsmenn rymja dátt
ríkissjóðinn þamba