Afi sótti

Afi greitt á gamla Rauð
götu fór í bræði.
Sótti létt og lítið brauð
lágkolvetna fæði.

Afmælisstökur

Í tilefni afmælis Ragnars Inga Aðalsteinssonar þá orti ég nokkrar stökur - þær eru of óskipulagðar til að vera samhangandi kvæði:

 

 

Kann vel flæði verks og vits
vill oft kvæði laga
Þekkir gæði ríms og rits
og rúnafræði braga.

Blót ei magnar böl né tuð
bragvís sagnaslyngi.
Oft af lagni ljóðin stuð-
lar hann Ragnar Ingi.

• 
  Fjöllum undir fæddist barn
  fegið stundi bjargið.
  Klettar drundu hreyfðist hjarn
  hátt- var -bundið argið.
  
  Fyrrum tál var fyllerí
  flaska hál í pappa.
  Núna skálar alldrei í
  alkahálum tappa.
  
  Róm að brýna í ræðu kann
  röðull skín á svörðinn.
  Sigurlínu sinni ann
  svo að hlýnar jörðin.

Ingi

Lyngi grænu öllu ann

aldrei landið sneyðir.

Ingi dafnar, hvergi hann

heiðar gróðri eyðir.

Bauð New York Times á fundinn

Veðrið

Þetta getur aldrei enst
en það fer að þreytast:
Um það bil þá veðrið venst
vill það aftur breytast.

Vínviður

Þegar ég drepst (sem vonandi er langt þangað til):

Eftir rjóma, öl og kex
og ýmsa fína lesti:
Oná leiði voru vex
vínviðurinn besti.

Stökur

 

 

Ljúffengt jafnan lífið er
þó löng og ströng sé glíma.
Glænýtt ár má gefa þér
gæfuríka tíma.

 

 

Ef þú dýrkar sæll og satt

 samstöðuna mína.

 Auð mun þjóðin eignast hratt

 og ýmislegt frá Kína.

 

 

En ef þú hvergi finnur vin þinn væna

vittu til og gráttu ei í þvegil

ef vongóður þú vilt nú sjá þig spræna

á vegginn hengdu flennistóran spegil.

 

Gluggagægir

Kom af fjalli, furðusveinn
fjarri breiðum vegi.
Þar rölti Gluggagægir einn
geðslegur var eigi.

Dökkar götur, drögin vot
dröslaðist um svartur.
Fann þá jafnan skúmaskot
ef skein of máninn bjartur.

Liðugur að ljósi rann
líkt og húsafluga.
Á kotum, glugga glæra fann
grályndur í huga.

Handtökin þar hafði skjót
í hirslum daufra glópa.
Gersemar og glæsidót
um greipar lét hann sópa.

-

En núna bankar blítt á gler
bjartur er án skugga.
Vænn hann lætur vita'af sér
veifar inn um glugga.

Sjá fleiri Jólasveinavísur

Klifað

Klifað (með smá svindli)

Læra talsvert þurfa þý
þingmennirnir æ og sí
síðan frama nokkrum ná
nái þeir að ljúga, já.

 

Jánka flest og þurrka þjó
þjónar auðs og lífsins gró
gróðinn eykur magamál
málma dýrka, tóm er sál.

Fjaðradýnur

Með metta vömb og veskið þykka,
vilja eitthvað mýkra.
Af fátækum þeir fiðrið pikka
í fjaðradýnur ríkra.

Tíðindi

Eftir atburði dagsins fannst mér þetta vera málið:

Tíðindi ég trega flest,
tómum augum góni.
Ryk á dökkan dropa sest
dimmt er yfir Fróni.