Þursaglampi

Guðir trampa, skjálfa ský
skvetta svampar tárum:
með þursaglampa'og þrumugný
og þarmakrampa sárum.

Þrumur og eldingar

Sólarglíman

Sólin glímir vetur við
vill hans grímu naga.
Bræðir hrímið, leggur lið
lengir skímu daga.

Þræsingur

Öskrar rok sem rammur þurs
regnið mokast yfir.
Rýkur þokan þvers og kruss
þræsings fokið lifir.

Skýin

Skýin hnykla skanka slæg,
skvetta'og stikla'á borðum.
Lemja, sprikla'og þinga þæg,
á þaksins lyklaborðum.

Suddinn ruddalegi

Nú liggur suddi landi á,
lænur nuddar tregur.
Fölur tuddinn finnst mér þá
fjári ruddalegur.

Klakabrynjusyndir

Vaknar skynjun, skugginn fer
skýrast kynjamyndir,
er klettar stynja, kasta'af sér
klakabrynjusyndir.

Fannhvít mjöll

Tómir keppir trítla völl
töðu seppar bíta.
Frelsið hneppir fannhvít mjöll
frerar teppið hvíta.

Fjöruferð

Í fjöru prúðan sáum sel
sæta hrúðurkalla,
klakarúðu, krummastél
og kuðungssnúðinn snjalla

Þaksins blámi

Enn er dagsljós ansi tregt
enn hér flaksast grámi.
Vor senn saxar vinalegt
vex þá þaksins blámi.

Ormahausar

Ormahausar upp nú gá
ísa fraus ei moldin.
Kolla hnausa kíkja á
klakalaus er foldin.