Heilræðavísa

Ef þú nemur annan hreim,
sérð augun grimm,
nefið finnur nýjan keim...
og nótt er dimm:
Þá opna skott og eyddu þeim
með MP5.

Full þörf fyrir vopnaða lögreglu

Tvær stökur frá júní/júlí

Regnið lemur hvasst og kalt
kælir djöfuls fokið,
breimar hávært blautt og svalt
bölvað norðanrokið.

 

Grímsey hún er glæsileg
græn með svarta dranga.
Þegar fer ég titra treg
tár á mínum vanga.

Rím

Smá rímæfing:

Fordómunum frenjan gýtur
flæða dreggjar andans,
áfram skítaskólpið flýtur...
úr skögulkjöftum landans.
Já skömmin alla bresti brýtur
- björt er ásýnd fjandans.

Vorið nálgast

Sólin blessuð svífur fjöllum ofar.
Eins og meyjan leggjalöng
ljósu skýin klofar.

Klakaböndin kreista úr sér safa.
Dropar niður detta ört
dansa létt og skrafa.

Sumarveðrið vekur jafnan kæti.
Lækjarkliður kallar hátt
kann sér varla læti.

Upp úr sandi urt af monti rifnar.
Feimin undir fjörustein
flóin brúna lifnar.

Sendlingstásur tælir græni sjórinn.
Björtum rómi, sykursætt
syngur fjörukórinn.

Sléttar fjaðrir sleikir þýður blærinn.
Spáir logni spekingur
spegilsléttur særinn.

Hvalbjór

Ýmsir nú sjúga með ekka
ölið með mjölinu flekka
en þykja ei leitt
því ljóst er það eitt
að þjóðlegt er þarma að drekka....

En alls ekki hræðumst né hörmum
hvalbjórin drekkum í förmum.
og gleðin við völd
ei gleymist í kvöld
því gott er að sjúga úr þörmum.

Þarmainnihald í hvalbjórnum

Til Tedda frænda

Bylgju sogar súgurinn,
silfruð togar gára,
kletta logar kvöldroðinn,
kyssir voga, bára.

Himnarjáfur hristir brá,
hljóðnar mávakvakið,
dropar skrjáfa, detta á,
doppótt sjávarlakið.

Fagurgali

Minkurinn með morkna sál,
svo myrk sem sótið.
Vildi fara út í ál,
- yfir fljótið.

Keikur hindrar för um fljót
ferjumaður.
Mærir sig og mælir bót
- minkur glaður.

Flaut þar skjall um ferjugarp
sem ferjað gæti.
Handan fljótsins fuglavarp
- fullt af æti.

Sagðist vera seigur þjónn
svanur tjarna.
Lygin er sem ljúfur tónn
- lóubarna.

Skella myndu skoltar beitt
skrímslin farga.
Gráa máva getur deytt
- grimma varga.

Menn sem hafa minkum treyst
það munu trega.
Loforðsgleðin getur breyst
- geigvænlega

Yfir fljótið för var greið
með ferjuhrói.
Glott um beittan skoltinn skreið
- skelfur krógi.

Ferjan yfir fljótið hrökk
fagnar stoltur.
Í land með græðgisglampa stökk
- glefsar skoltur.

Loðið skottið skaust þá hratt
um skuggasali.
Fljótlega í farið datt
- fagurgali.

Seigur karl

Vösk þar þótti vendingin,

viðhaldið var breima,

í loftköstum var lendingin

nú ljómar Frúin heima.

Lenti í íslenskum hálendisrudda

Fésbókarhækur nr. 1

Hérna er hæka,
hamingju rúmlega fyllt.
Líf er að læka.

Þrátefli, þræta,
þögnin er yfirleitt stillt.
Sæt er hún Sæta.

Taumlaust þó taggar,
telpan hinn hugdjarfa pilt.
Vefmyndin vaggar.

Kommentin kafna,
kynleg er röddin oft villt.
Dásemdir dafna.

Bubble Crush beiðni,
berst hratt um fésbækur tryllt.
Lævís er leiðni.

Hér voru hækur,
hugsunin gruggug og gyllt.
Fagna fésbækur.

Hádegismóar

Haninn í rökkrinu hefur enn skitið
og hænurnar spakar á þúfuna gjóa,
en flestar þær sjá þó að farið er vitið
og fjaðrirnar gisnar á kjúllanum sljóa.
En jafnóðum sekkur þó sorinn og dritið
í svörðinn og hverfur í Hádegismóa.