Leita í fréttum mbl.is

Færsluflokkur: Ljóð

Norðurljós og eilíft haust

Norðurljós

Vonir birtast, sárt en satt.
er Sólin lemur harðar,
og sameindirnar sullast hratt
um segulhvolfið Jarðar.
 
Eilíft haust

Sólin rís kinnroðalaust
rétt svo yfir sænum.
Þó ei bríni þíða raust
þiðnar snjór í blænum.

Árið skríður endalaust,
eilíf virðist saga.
Haust og haust og haust og haust,
haust er alla daga.
 
Mannvonska
 
Útlendinga úthýsing
mun arfleifð ráðherra.
Morkin verður mannlýsing,
á mætum óþverra.
 
Gamlir pungar
 
Barma sér og bölva, klúrir,
bláu ungarnir.
Grjótharðir nú gerast súrir,
gömlu pungarnir.

Konungleg kveðja

Í dagsins amstri dreymi smá
um drykkinn fagurbrúna.
Fullur er af ferðaþrá
fæ mér kaffi núna.

Notalegt var niðrá strönd,
næs við heiðarbrúna.
Kaldir toppar, kólna lönd
kaffi fæ mér núna.

Það er hvorki ljóst né leynt
hvað lífsins grín vill fúna.
Fráleitt alltof finnst mér seint
að fá mér kaffi núna.

Nokkrar stökur

Tófuhjalli

Sætt var hræ við sjávarhlein
nú sit ég upp til fjalla,
fjaðrir tæti, bít ég bein
og bryð á Tófuhjalla

Sumarfríið

Sumarfríið er víst oft,
ætlað til að njóta,
tærnar allar upp í loft,
og í pottum fljóta.

Rugla
 
Semjum kvæði um sól og hross,
sjávaröldu, fugla,
verðbólgu og varakoss,
vænlegt er að rugla.

Lúsmý
Milli frekna, fann ég sjóð,
feygð mun burtu draga,
volgt og görótt gæðablóð,
gómsætt fyllir maga.

Hnattræn hlýnun
Vissulega viljum grið
vargöld burtu hrindum,
börnin munu berjast við
 bæta'úr okkar syndum.

Brúðkaupsafmæli, fjögur ár
 
❤️🌹
Ber af öllum, fær við flest,
feikn er hennar máttur.
Konan mín er bara best,
byrjar fimmti þáttur.

Fýluvísur

Þeir sem dreyma drjúga hít
af dóli ferðamanna
fá víst aðeins aur og skít
og óbragð milli tanna.
 
-----
 
Yfir mönnum mæddur er,
að Manú grasið sleiki,
níðir aðra þursinn þver,
þurrt nú grætur Eiki.

Mórall yfir markaþurrð,
man hann fyrri siði,
um fyrritíða fótaburð
sem farinn er hjá liði.

Hryllir Eika hengiflug,
hans mun liðið jagast.
Eftir kannski áratug,
ætti samt að lagast.

Heilræðavísur

Viðkvæma þú vernda skalt,
vonlitla og snauða.
Hjálpin getur hundraðfalt
hindrað eymd og dauða.

Tærast mun og teljast best
tölvuna að slökkva,
líðan eykur, læknar flest
að labba um og stökkva.
 
Blóðug sporin bleyta for
blæðir fugl í kjafti.
Glæðist vor við gæfuspor
að geyma kött í hafti.

Ýmsar stökur

Draumaráðning:
Fjarska glögg er framtíð dökk,
flækjustigið lítið þó.
Allt til heljar, myndar mökk,
móða hylur gæfuþjó.
 
Fækkun sýslumanna:

Sýslupeyjar, einn og átta
aldrei týna skjölunum.
Víða'um land þeir vilja þrátta
vasklega í sölunum.

Nonni arkar utangátta
á að fækka hölunum.
Þá kom frétt í fréttatímum
og fárast yfir tölunum.
 
Grútur:
Ljóta grútinn þarf að þvo,
þurrka upp og vinda
Leggja í bleyti, lækna - svo
laskist siðarblinda.
 
Vísnagáta:
Liljuhvítt og ljósbrún skel.
Leikföng nokkuð snúast.
Glæsta fólkið grýtir vel.
Glás í búðir hrúgast.

Vetrarhækur

Þraut er þorratíð
þekur gróður fönnin köld
frostið
býtur fast.
 
Fuglar kroppa fræ
flögra um og dusta snjó
kalda grípa grein.
 
Brimið hefur hátt
hávellurnar kallast á
sígur vetrarsól.

Tvær ótengdar stökur

Magga Skúla

Aldrei glepur geðið fúla
góð er lund þín tæra.
Mætar óskir, Magga Skúla
má þér alltaf færa.

 

Orðagjálfur

Þó ég geri glöp oft sjálfur
góða fólk, upp rísum.
Aðeins stundum orðagjálfur
inn'í bundnum vísum.

Syngur og hoppar

Ort haust 2014
 
Sólskríkjan hljóðlega syngur
því sumars er lokaður hringur
og bráðlega kroppar
í kornið og hoppar
fimlega'í fönn snjótittlingur.

Skammdegisstökur

Feitmeti burt fælir dróma,
flestallt bætir mikið smjör.
Út í kaffið kreisti rjóma,
klára það með bros á vör.
 
Hissagaur og hláturinn,
hjartað, knúsið góða,
lækið, grimmd og gráturinn,
gerir marga óða.
 
Flæðir vatn um bergið bratt
brestur hávær kliður.
Bræðir skafl og grýttan gafl
grýtir kaldar skriður.

« Fyrri síða | Næsta síða »

Höfundur

Höskuldur Búi Jónsson
Höskuldur Búi Jónsson

Ég yrki og blaðra.

271 dagur til jóla

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (28.3.): 0
  • Sl. sólarhring:
  • Sl. viku: 3
  • Frá upphafi: 0

Annað

  • Innlit í dag: 0
  • Innlit sl. viku: 3
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband