Spáin

Spáin þín er spekingsleg

spennan mun oss þrúga

en þessi úrslit ætla ég

einfaldlega að trúa.

Tvær ótengdar stökur

Magga Skúla

Aldrei glepur geðið fúla
góð er lund þín tæra.
Mætar óskir, Magga Skúla
má þér alltaf færa.

 

Orðagjálfur

Þó ég geri glöp oft sjálfur

góða fólk, upp rísum.

Aðeins stundum orðagjálfur

inn'í bundnum vísum.

Tvær stökur í nóvember

Himnafeður hlaða í

harða kalda bakka,

ákaft senda gegnum gný,

gráa éljaklakka.

 

Varla er alltaf stanslaust stuð

en stundum birtist fagur

laus við glýju, grimmd og puð

gleymanlegur dagur.

Nokkrar stökur

Síðla veturs:

Vekur jurtir, vermir grund

vor í byrjun Góu.

Ég held að eftir hálfa stund

heyrast muni í lóu.

 

Hnígur volgur hnjúkaþeyr,

hneggja fákar glaðir.

Kvoðnar niður klakinn meyr,

klökkna fannatraðir.

 

Vorvísur: 

Nístir kul í norðanátt,

nötrar fölgul sinan.

Von er heit að víki brátt,

vonlaus kuldahrinan.

 

Sækir að þá sunnanátt,

svörðinn regnið vætir.

Grænka hólar hátt og lágt,

hlýjan fugla kætir.

 

Gaypride:

Fráleitt tel til falsvonar

að fjölbreytnin hér blífi

og allir geti allskonar,

unað sínu lífi.

 

Sumarfrí:

Svif ég inn í sumarfrí,

sæludaga.

Gælir við mig golan hlý,

grasið naga.

 

Haustdagur:

Styttast dagar, fölnar fold

fjársins kólna trýnin.

Lopapeysur hylja hold

hverfa trampólínin.

 

Munurinn á kúk og skít: 

Flokka mestallt má með lykt

-það margir ná að feika.

En blautleiki og breidd og þykkt

býr til glæsileika.

Smáfuglar

Heitt fæ kaffi og kakómalt,

og krás úr eldhúsinu.

En smáfuglarnir kroppa kalt

korn af gulri sinu.

Mikilvæg V

Virðing

Með vinnusemi virðing gefst 
en vart með kjaftahnoði.
Eitt er víst hún aldrei sést
í alnets gylliboði.

 

Von
Mæðir ársins maraþon

á  mörusundi.

Nýja árið vekur von
um vinafundi.

 

Vinátta 

Vinafundur magnar mund

ég mæta ykkur vildi.
Því kær er stund og lifnar lund,

ljúf með hláturmildi.

Covid og Sörur

21. nóvember Sörur

Vantar ekki vörurnar,

um víðfeðmt internetið.

Svartamarkaðs sörurnar

sífellt get ég étið.

 

Sörubakstur svíkur ei

svitna vart við staupið.

Gliðnar veski, gleður mey,

geggjað tímakaupið

 

22 október Covid

Lymskufullt og ljótt er haust

leitt er þófið.

Enginn gengur grímulaust

gegnum Kófið.

Nú er ástand nokkuð svart,

næstum óvit.

Allir gera ætla margt,

eftir Covid.

 

 

Uppsafnað

11. október

Aðgang að eggvopnum skerðið

og aðgerðir lögreglu herðið

verslanir tæmið

svo takist nú dæmið

því tússinn er beittari en sverðið.

6. september

Blæs ört vindur brýnir raust,

blöðin gulu lemur,

laufin visna, vaknar haust,

vetrarljóðin semur.

Ég var ekki fullkomlega ánægður með 2019 og orti þetta á gamlársdag - en gleymdi að birta. Mig grunar að ég eigi eftir að fagna enn meir þegar þessu ári lýkur.

 

Eitt var slæmt og annað skár,

ei mun bölva og ragna.

Mér fannst þetta misjafnt ár

mun því nýju fagna.

Ég leysti frænda minn af einn dag í sumar á sjó:

 

Flakkað hef um falleg mið,

frekar illa rata.

Langt var ekki landstímið,

en lítil skítafata.

 

17.júlí

 

Undan starfi ströngu flý,

strögl í miklu puði .

Sigli nú í sumarfrí

í sól og góðu stuði.

(um himinn arka úfin ský,

frá illum veðurguði.)

Sumarsól

Dauft er húmið, dröfnin slétt,
dansar sól á feldi.
Fuglaskrafið furðu létt
á fögru sumarkveldi.

Vor 2020

Vorið kemur vítt og bjart

í vonar klæðum.
Voðalega veit ég margt
í veirufræðum.