Stöku staka

Forsetinn:
Ekki er gatan alltaf breið
ýmsar hættur leynast,
en forsetinn hann fer þá leið
sem farsælust mun reynast.

Tengdamamma sjötug:
Að rótum hlúir, reitir arfa,
ræktar beð í erg og gríð.
Tengdamóðir mín mun starfa
meðal blóma alla tíð.

Sléttubönd:
Sjaldan yrki, vondar vísur
velta útúr kjafti.
Aldan gutlar, hávært hnísur
hlægja, skeljar lapti.

Brúðkaupsvísa:
Að ykkur núna allir dást,
það okkar gleði sannar.
Sífellt ræktið sanna ást,
Sigga Rún og Fannar.

Pottavísa:
Sólin glóir, geislar ljá
glit við sjó og potta.
Fegnir þangað fara þá,
ferðamenn til þvotta.

Sumarkuldavísa:
Norðanvindar naprir streyma,
nötrar allur Flóinn.
Víst er gott að vera heima,
þá vælir kaldur spóinn.

 

Örfáar stökur

Nokkrar stökur sem hafa safnast saman undanfarna mánuði: 

Þorri:

Þó að kaldur Þorri sé
þiðna ég á blótum.
Súrar klaufir, sviðin hné
sinar ét af fótum.

Þegar sé ég þorrafat

þá verð ég mjög æstur.

Ginið opna, gleypi mat

góður er hann kæstur.

 

Hertur, reyktur, saltur, súr

sviðinn mat ég kyngi.

Fer í Þorra ketókúr

kátur þó ég spryngi.

Hálf sléttubönd:

Kraftur brestur latur les
línur þessar aftur.
Aftur þessar línur les
latur brestur kraftur.

Vísnagáta 1 (tilgáta að svari velkomnar í athugasemdum):

Veldur ísköld vetrarnótt,
vír úr teini grönnum,
læsir hurðum hart og mjótt,
hörð er böl í tönnum.

Lífskjarasamningur

Loksins komu kjarabætur

krydd er nú á fiski.

En hótelstjórinn hávært grætur 

í humarinn á diski. 

Vísnagáta 2 (tilgátur að svari velkomnar í athugasemdum):

Garp í grundu neyðir,
geymast krakkar reiðir,
vel hann gjarnan veiðir,
vætu framhjá leiðir.

Ærslabelgir:

Oft í miðju martraðar,
myndir ljótar detta,
er upp úr grasi allstaðar,
ærslabelgir spretta.

Júní:

Góð er tíðin, grænkar hlíð og gljúfrin víða.
Júníblíða, brumin prýða,
blómin fríðu landið skrýða.

Hola

Allt er núna út úr kú,
ekki mun ég vola,
minn er vinur napur nú,
næstum orðinn hola.

Vetrarfönnin

Vetrarfönnin vekur þjóð
varla sést í stiku.
Þessi staka, glögg og góð
gleymist eftir viku.

Krumlur Kára

Hrikalegar krumlur Kára
klóra skegg á þaki.
Vorsins gras og grænan smára
geymir snjór og klaki.

Tjarnir stynja kaldan kost
klakinn brynjar lindir.
Eykur skynjun foldar, frost
frerans kynjamyndir

Ein og ein staka

Yfirlýsing:

Elsku fésbók ekki hirða
allt mitt líf og myndir.
Við það orðspor munið myrða.
Mínar felið syndir.

Hóflífi

Hóflífið það hreinsar þjó 
heilsufæðis njótið. 
Vonlaust eflaust verður þó
veganúarblótið.

Árið

Árið byrjar eins og stundum 
enginn balans finnur.
Hvergi finnst nú klaki'á grundum
Króatía vinnur.

Hnöttótt

Hnöttótt er og fráleitt flöt
fögur jörðin, góði.
Aumt er að skatta úldið kjöt
af því hvergi gróði.

 

Staka á dag

31. desember

Svífur yfir svifryksfárið
sumir vilja sprengja. 
Nú er búið enn eitt árið 
enn fer dag að lengja.

1. janúar

Nú er startar enn eitt árið
ansi margt má bæta:
Hlægjum bjartar, hunsum fárið
hættum að kvarta'og þræta.

2. janúar

Þraut er mikil það að spá í þetta veður.
Af sér klakann áin ryður,
ennþá samt er vetur miður.

Sjóbaðsvísa

Desember með drjúgan kvið
drulluköld við örkum mið.
Í jökulkulda og jógafrið
Jólastjörnu myndum við.

Stökur

Furðu oft þá finnst mér að
frekar lítið hafi val,
um hvað skal segja, hví er það,
og hvernig vísu enda skal.

--

Ef bragga fagran byggja á
þá brúkast góðir hanskar,
svo út í garði stingast strá
sem standast kröfur danskar.

--

Mjöður klístrast, mýkist smér
meyrir blístra vanir.
Á veggjum tvístrast kvæðakver
komu ístruflanir.

Mýrarsnípa

Fastar klípur, kælir bóg
kuldinn grípur trítil.
Situr hnípin, meyran mó
Mýrarsnípa lítil.