Morgunvísa

Úti fannir fjúka

fjalla milli gátta.
Morgunskitan mjúka

mætti klukkan átta.

Vísa

Líða'um himinn lagleg ský

ljóst á köldum vetri.

Þessi vísa verður því 

varla mikið betri.

Námsmenn

Þingmenn oft skrönglast á skjánum
með skruddur og glósur á hnjánum
því væri það best
ef væru þau flest
á verðtryggðum námsmannalánum.

Kvein frá Kvíabryggju

Fréttamenn nú fóru'á skrið

föngunum þeir breyttu'í smið.

Höfðu margt í hyggju.

 

Stöð 2 mun samt standa við

stórkostlegan dagskrárlið:

Kvein frá Kvíabryggju.

Nýmóðins

Gott ráð skjótt mun gefast þér

gaur ef ert í baksi

já bráðum mun víst birtast hér

bréf í telefaxi.

 

Ef tölvusóttin veikir vél
svo verði jafnvel miski:
Gögnin skalt þá geyma vel
á gráum floppídiski.

Nokkrar stökur

Arnarnesingar hyggjast læsa að sér:

 

Íðilfagra Arnarnes

yndislegt og mikla

harðlæsum nú hliðum vés

og hendum síðan lykla.

 

Eftir jól:

 

Þó að það sé nokkuð næs
að næra sig um jólin,
kann að heyrast kröftugt dæs
er kemur aftur sólin.

 

Árið:

Sannleikur er sirka klár
þó sífellt efinn nagi:
Var það líkt og önnur ár
- yfir meðallagi?

 

Nýr forseti:

Nú er aftur voðinn vís

varla finnst þá paradís

Gleðin hverfur, hjartað frýs

hættir bráðum Óli Gríms.

 

 

 

Kuldastökur

Élin lemur kalda kinn
kalt er nef og haka.
Veðrið ælir enn um sinn
ís og blautum klaka.

Frerablómin blómstra dátt

blöðin kuldinn skerpir.

Hafnarfjallið fölt og grátt

fötin að sér herpir.

 

Lífsins vítamín

Í krísu getur kvæðamergð
kreist fram brosin fín,
ljóst er því að ljóðagerð
er lífsins vítamín.

Pólitísk staka

Þó oft sé mikill munur á
milli hægri'og vinstri.
Flokksgæðingar flestir þrá
að fylgja sama mynstri.

Í Þorskafirði

Víða kólnar vetrar senn
visna lendur kaldar.
Í Þorskafirði þrauka enn
þrettán sprækir tjaldar.