Að blogga ferskeytlu.

Að blogga þykir frekar fínt
en ferskeytlan því kvíðir.
Kvæðið innan alls er týnt
en þó finnst um síðir.

Múmíu fundur.

Í Egyptalandi varð undur
svo urraði'og gelti þar hundur.
Haldinn þar var
á víðþekktum bar
fjölmennur múmíu fundur.

Hugsunargangur hagfræðings:

Okkar viska'er kræf og klók
við kæfa getum floppið.
Þorskaflinn er bankabók
sem bólgna mun við stoppið.

Enginn veit.

Enginn veit hvað undir býr
öldum fyrir neðan.
Þref um aura, þrasið knýr
þorskur deyr á meðan.

Þorraþræll Afríkubúa.

Víst er bras og veröld dökk
varla gras upp stingur
kólnar lasin konan blökk
og kvef fær nashyrningur.

Skítaræsið heillar.

Lífstíð glötuð lykt á rann
ljótur skötuselur.
Í skítajötu skólpa hann
af skrítnum hvötum dvelur.

Í dómsorði skal standa:

Rök skal treysta'og ráðin sling
ris og neista berja:
Pung skal kreista, kremja ling
á karli eistun merja.

Hár tollur.

Sækir að mér sérhvern dag
sviti'og kaldur hrollur.
Álversvirkjun eflir hag
en alltof hár var tollur.

Limruvilla.

Í Flórída'er flott og oft stillur
og fá sumir magnaðar grillur
hlýtt er oft það
og þurrt ei sjóbað
en vill einhver kaupa þar villur?

Heilræðavísa

Ef að freyðir fýlan þín,
frek er reiðin þanda,
þegar leiði svertir sýn,
samtal eyðir vanda.