Dæmigert.

Þeir gefa ei virðingavott
en væla með háði og spott
oft eru þeir
einn eða tveir
sem gagnrýna það sem er gott.

Gluggaveður

Sér í vatni svanur þvær
sólin alltaf gleður.
Norðanvindur napur hlær
nú er gluggaveður.

Inn í kompu.

Inn í kompu einn ég sit
og minn penna naga.
Úti fuglar fleygja drit
í fagra sólardaga.

Mannvonska

Ég flytja vil í fornan dal
í felum yrkja svörðu.
Fá engar fréttir ekkert mal
um eymdir lífs á jörðu.

Ástarrím.

Enn ég ríma, ástin mín
enn ég glíma'og snarla.
Eg ætla'að síma inn til þín
en ég tími'því varla.

Ástandið í hnotskurn.

Úti tónar eymdardjass
alveg krónu rúinn.
Á meðan bónar mör og rass
mætur Frónarbúinn.

Götudómar

Syngur ómur haturs heitt
hér fer drómi'um engi.
En götudómar geta meitt
góða sómadrengi.

Bíó-etanól

Er sýning hefst ég sest í stól 
og sötra ropvatnsfjanda.
Oft ég bíó-etanól
þó út í kókið blanda.

Hundadráp.

Vöntun fá í vöggugjöf
vits og gæfurjóma.
Sveittir moka sína gröf
svefngenglar í dróma.

Fiskveiðistjórnunarkerfisvillulimra.

Togarar lífríkið tæta
en trillurnar ungseiðin gæta
á sjónum með króka
karlar sig spóka
og botndýrafánuna bæta.