Stökur um iðrapest

Staðan í gær

Feikna slæman finn ég sting
og fátt er því til bóta,
upp og niður og allt um kring
iðravökvar fljóta.

Staðan í dag

Blautir straumar láku létt
um lasinn rumpinn þjáðan.
Taktu eftir, tær er frétt
mér tókst að prumpa áðan.

Sætt, rammt og súrt

Sætt, rammt og súrt - með þorra ívafi.

Hér skal ort eitt kvæði klúrt
og kaflar þess vel valdir.
Það mun verða soldið súrt
sem svið og pungar kaldir

Það skal verða villt en stamt
og vænt sem mör af lambi.
Seinna mun það reynast rammt
og reimað beisku drambi.

En stakan verður eflaust æt
eins og ber í rjóma,
sem rófustappan sykursæt
sveipuð gulum ljóma.

Niðurstaðan er þá eftirfarandi staka

Ég hef gegnum súrt og sætt
sopið ramman vökva,
heillað lýð og hjörtu brætt
- hér má aðeins skrökva.

Krían

Eins og þúsund glerbrot glamri,
glymji á rúðu haglið svalt
kastist grjót úr klettahamri
krían skríkir hátt og snjallt

Afmæliskveðja

Inn ég lauma ástin mín
afmæliskveðju smáa.
Þú ert eins og eðalvín
-aldur þér veitir gljáa.

Þorrastaka

Köld er tíð og þrýtur þor
Þorri mörg þú kælir spor
sporin djúp í fallna fönn
fönn og gjóstur ýfa hrönn

Kvöl

Kvöl er þetta litla ljóð
ljóð um neista, snark og glóð
glóð sem kveikir blóðþyrst bál
bálköst sem er okkar mál. 

Vetrarvísa

Hvíta breiðan hnýtir fold
og hristir snauða daga.
Brýtur, sneiðir, bítur hold
og blæs um dauða haga.

Framtíðin

Bíður ævin bak við hól
bærilig.
Framtíðin í fölum kjól
felur sig.

Oddhenda um veðrið

Kulda slettur koma þétt
klif og hettur glamra.
Brimið kletta, brýtur grett
bónar slétta hamra.

Grútur og smér

Ég reiknaði fastlega með að fá umgangspest sem var að ganga í fjölskyldunni - það gekk ekki eftir, en ég var þó klár með limru:

Lasinn en ligg ei af skömm
þó lyktin sé helvíti römm
í gegnum mig fer
sem grútur og smér
gallon og eittþúsund grömm.