Veðrið

Fögur svífa fiðrildin og faðma glugga.
Í fjarska lemur einhver ugga
öldur svo að teistur rugga.

Um stjórnmálamenn

Köllun finna, flæðir afl
fyrirhafnarlítið.
Seinna þykir sjálfsagt tafl
að svíkja pínulítið.

Af nógu er að taka

Gefum okkur gáfnahaf
þar gjöful veiðist spraka.
Þó nokkur prósent nagist af
af nógu er að taka.

Andlegri getu hrakar eftir fertugt

2011-2012

Megi gróa mæðusár
og minning sæl fram spretta.
Nú má verða næsta ár
nánast eins og þetta.

Kertasníkir

Bráðum kemur Kertasníkir
með klakabrynju í húfu.
Skó í glugga á glámur kíkir
og gjafir færir þeim ljúfu.

Skyrgámur

Skyrgámur næst skálmaði
skafla hungurmorða.
Um dimma flóa fálmaði
fír og vildi borða.

Sterkbyggður og stór hann óð
og stökk hratt þúfna milli.
Vaskur rann í vígamóð
vildi magafylli.

Í skímu nætur skreið hann inn
í skuggalegan bæinn.
Slunginn beið með slef á kinn
þá slær og gaular maginn.

Biðlítill við búrið hékk
það beygir hungrið sára.
Upp að tunnum æstur gekk
óhrært skyr sást klára.

En núna trítlar tískuhró
sem treður sig í kjólinn.
Hann kallar bara hó hó hó
og hristir búk um jólin.

Sjá fleiri Jólasveinavísur

Undrahundur

Lög ei grunda, grey í Eyjum
því glundrast blundur meira.
Þar ergjast lundar enn í peyjum
og undrahundar keyra.

Hundur ók á bíl í Eyjum

Skíma sólar

Skíman er skrítin og dauf
skelfing er lítill kraftur.
Fölgul og fjörlítil rauf
fljótlega leggur sig aftur.

Ljóðagerð

Ljóðagerð er listugt fag
ljótt er það.
Ekkert mun ég yrkja í dag
eða hvað?

Jóla köks

Búinn að baka eftirfarandi:

Karamellu- og kókostoppa
kjarna hafradrauma
Loftkökur og lakkrístoppa
ljósbrúna randastrauma.