Andar köldu

Andar köldu'um flóa'og fjörð
freyða öldusmérin.
Bylgjuskjöldur brýtur svörð
nú busla földu skerin.

Fýkur mjöll

Fýkur mjöll um freðna jörð,
fyllir völl og dali.
Niður fjöllin fannahjörð,
flytur spjöll um sali.

Kertasníkir

Hangiketið höfgar bæ
hérna gleði ríkir.
Trítlar úti'og treður snæ
Tólgar-Kertasníkir.

Bjúgnakrækir

Af fjalli birtist blásvört mynd
Bjúgnakrækir ljótur.
Fljótur niður freratind
fældist þessi þrjótur.

Iðragaulið innra brann
ekkert var þá nartað.
Ilm af krás á raftur rann
í reyknum ei var kvartað.

Karlinn þessi kunni list
að klifra upp í rjáfur.
Iðrafylli upp við kvist
uppskar bjúgnaháfur.

Af bjálkanum var bjúgnagnótt
bragðgóð mettuð fita.
Fengsæl var og niðdimm nótt
er nældi'hann sér í  bita.

En núna er hann algjört spé
og engum sýnir hroka.
Gengur kringum grenitré
og gefur nammipoka.

 

Sjá fleiri Jólasveinavísur

 

 

hrefnutjörn

Sýpur hveljur hrefnutjörn
hvæsir bylgjufaðir.
Út af skeri urtubörn
ýta bárutraðir.

Öldukast

Við öldukastið orku finn
ekkert ber á þynningum.
Hann klifar ákaft krafturinn
þó kominn sé að grynningum.

Haustvísa

Ljótur vindur leggst á kjarr,
lauf um polla kjaga
Játast friði Jónsi Gnarr,
Jókó Ó og Gaga.

Lady Gaga þakkaði Jóni Gnarr

Vísnagáta

Ég orti stöku um daginn. Þegar hún er slitin úr samhengi, þá minnir hún á vísnagátu. Nokkuð auðveld:

Veltir knerri, vekur hríð
veldur þerri snjöllum.
Eins og hnerri oft á tíð
og ívið verri'á fjöllum.

Samviskubraut

Sæll hef ég jafnréttið svikið
og sefaðri dómgreind frá vikið.
Af samviskubraut
ég beygði og hnaut
en blygðast mín hreint ekki mikið.

Ólíðandi að ráðherrar brjóti jafnréttislög

Stökufóður

Út úr hlöðu óðinn dreg
ilmar kvæðagróður.
Gott mér þykir, játa ég
að jórtra stökufóður.