Grenja gárurnar (aukahringhenda)

Bláar frenjast bárurnar
bát þær þenja'í klessu.
Rjúka'og grenja gárurnar
greyin venjast þessu.

Vetrarmuggan

Vetrarmuggan buslar blá
bærir ugga sína.
Sjóinn gruggar, syndir hjá
svævir huggun þína.

Uppfyllingahringhenda

Skugginn stígur, skelfir þig
skríða kvígur bjálka.
Er þú hnígur ögn á svig
úti flýgur hálka.

Sinustrá

Ó sólskinið er svo tregt
yfur dynur hula
Af því stynur stæðilegt
stráið sinugula.

Ógildur vetur

Vetur gildan gerði sig
gróðurspildur huldi.
Nú brosir mildur, bræðir þig
burt er sigldur kuldi.

Bansett

Bansett rigning glymur glöð,
grenjar tignarlega.
Nú er lygnan heldur hröð,
hríslur svigna'af trega.

Þögnin rofin

Kliður sjávar klingir ögn
kalla mávar sunnar.
Við öldurjáfur rýfur þögn 
rómur hávellunnar.

Jakahrönnin

Hrafninn þjakar hret og frost
hörð nú brakar fönnin.
Goggur blakar glæran kost
grá er jakahrönnin.

Geðprýði

Galla eigin sína sér
sjaldan skiptir geði.
Hjalla refsins ofar er
aldrei bælir gleði.

Gagnrýnir stjórnarskrárfrumvarpið

Klettadoppa

Bylgjur skvetta bæra stein
bárur nettar skoppa.
Á þarafléttu þraukar ein
þögul klettadoppa.