Spáin

Spáin þín er spekingsleg

spennan mun oss þrúga

en þessi úrslit ætla ég

einfaldlega að trúa.

Tvær ótengdar stökur

Magga Skúla

Aldrei glepur geðið fúla
góð er lund þín tæra.
Mætar óskir, Magga Skúla
má þér alltaf færa.

 

Orðagjálfur

Þó ég geri glöp oft sjálfur

góða fólk, upp rísum.

Aðeins stundum orðagjálfur

inn'í bundnum vísum.

Syngur og hoppar

Ort haust 2014

 

Sólskríkjan hljóðlega syngur

því sumars er lokaður hringur

og bráðlega kroppar

í kornið og hoppar

fimlega'í fönn snjótittlingur.

Skammdegisstökur

Feitmeti burt fælir dróma,

flestallt bætir mikið smjör.

Út í kaffið kreisti rjóma,

klára það með bros á vör.

 

Hissagaur og hláturinn,

hjartað, knúsið góða,

lækið, grimmd og gráturinn,

gerir marga óða.

 

Flæðir vatn um bergið bratt
brestur hávær kliður.
Bræðir skafl og grýttan gafl
grýtir kaldar skriður.

Tvær stökur í nóvember

Himnafeður hlaða í

harða kalda bakka,

ákaft senda gegnum gný,

gráa éljaklakka.

 

Varla er alltaf stanslaust stuð

en stundum birtist fagur

laus við glýju, grimmd og puð

gleymanlegur dagur.

Nokkrar stökur

Síðla veturs:

Vekur jurtir, vermir grund

vor í byrjun Góu.

Ég held að eftir hálfa stund

heyrast muni í lóu.

 

Hnígur volgur hnjúkaþeyr,

hneggja fákar glaðir.

Kvoðnar niður klakinn meyr,

klökkna fannatraðir.

 

Vorvísur: 

Nístir kul í norðanátt,

nötrar fölgul sinan.

Von er heit að víki brátt,

vonlaus kuldahrinan.

 

Sækir að þá sunnanátt,

svörðinn regnið vætir.

Grænka hólar hátt og lágt,

hlýjan fugla kætir.

 

Gaypride:

Fráleitt tel til falsvonar

að fjölbreytnin hér blífi

og allir geti allskonar,

unað sínu lífi.

 

Sumarfrí:

Svif ég inn í sumarfrí,

sæludaga.

Gælir við mig golan hlý,

grasið naga.

 

Haustdagur:

Styttast dagar, fölnar fold

fjársins kólna trýnin.

Lopapeysur hylja hold

hverfa trampólínin.

 

Munurinn á kúk og skít: 

Flokka mestallt má með lykt

-það margir ná að feika.

En blautleiki og breidd og þykkt

býr til glæsileika.

Smáfuglar

Heitt fæ kaffi og kakómalt,

og krás úr eldhúsinu.

En smáfuglarnir kroppa kalt

korn af gulri sinu.

Brestakort

Ég sá á internetinu brestakort fyrir Þingvallavatn - sjá hér https://orkustofnun.is/gogn/Teikningasafn/85.04.0589.pdf

Þetta er alveg upplagt orð til að búa til limru úr:

Ég þekki vel hugtakið hestasport,
og hef núna kynnt mér eitt brestakort,
en aldrei í riti
(altsvo af viti)
pistill mun birtast um prestaskort.

Kertasníkir

Í nótt kemur Kertasníkir

 

Seinastur úr skugga skreið

skrattinn Kertasníkir.

Börnin verða lostin, leið

á ljósin naggur kíkir.

 

Í skammdeginu skín svo bjart

skíma kertaloga.

Sleikir út um, slef og nart

í slarki ljósin toga.

 

Úr myrkri birtist mögur hönd 

mætust ljósin koðna.

Sést í neglur, sorgarrönd

og sviðna putta loðna.

 

Augun tóm af tólgarfíkn

tennur vilja snerta.

Físnir kvelja, fær smá líkn

af feitum tólgi kerta

 

---

En núna vinsæll vappar hjá,

væn er jólatörnin.

Bestar gjafir gefur þá

gleðjast litlu börnin.

Mikilvæg V

Virðing

Með vinnusemi virðing gefst 
en vart með kjaftahnoði.
Eitt er víst hún aldrei sést
í alnets gylliboði.

 

Von
Mæðir ársins maraþon

á  mörusundi.

Nýja árið vekur von
um vinafundi.

 

Vinátta 

Vinafundur magnar mund

ég mæta ykkur vildi.
Því kær er stund og lifnar lund,

ljúf með hláturmildi.