Frostburknar

Í morgun:

Út úr bílnum illa sá
mér elsku vinur, trúðu,
því frammí uxu frjálsir þá
frostburknar á rúðu.

Kuldi

Frostrós brynnir, kuldakast
kelur skinn á sveini,
nartar kinnar, nagar fast
nístir inn að beini.

Litla hagyrðingamótið og áramótastaka

Göngumaður ansi oft

er utanvega.

Yndislegt er útiloft

og útilega.

 

Mjúkan snjó og myrkrið svart

skal meta og vega.

Nauðsyn stundum einnig er

smá innilega.

 

Fjölgun okkar er ei grín

og eykur trega.

Samt er ávallt ansi brýn

smá uppilega.

 

-----

 

 

Allt er núna orðið hreint

áramótadraslið.

Hríðin, landið hefur skeint

hefst nú kuldabaslið.

Til Jóa Gunna

Dökkt er yfir Drang og Flóa

deyfa himinn skýin grá.

Kaldir vindar væta móa

vökna fellin stór og smá.

 

Í stríði og friði stendur meyjan

sterkbyggð verndar fjörðinn þinn,

faðmandi er fagra Eyjan

í fögrum kjól og þerrar kinn.

 

Í fjarska þagnar fuglakliður

frændi, þú varst okkur kær.

Helgur sé þinn hinsti friður

hjartans kveðju sendir Bær

Ársuppgjörið

Nú er búið ferlegt fár
fúlt af ýmsu tagi.
Verra þótti en önnur ár
undir meðallagi.

 

Aukastaka samin sama dag:

 

Hér birtist stundum bölvað hnoð
blandað illu geði.
Drulla, skítur, mykja, moð
með miklu andans streði.

Sigurður Dýralæknir

Orti smá til heiðurs Sigurði Sigurðarsyni fyrir stuttu:

 

Hér skal kveða karli brag

kitlar gleðistrengur

Slær á hnéð sér hress í dag

heill er eðaldrengur.

 

Gæðapiltinn sóma sé

síst er spilltur strákur.

Læknar gyltur, gleður fé

góður stilltur fákur.

 

Drekkur ráð um dýrin flest

doktor, gráðum skrýddur.

Skepnum þjáðum bjargar best 

býsn af dáðum prýddur.

 

Lífið glæðir, ljúf er værð

lækur flæðir glaður.

Óskir gæða frá oss færð

færi kvæðamaður.

Stutt vísa um Gáttaþef

Ískalt loftið kyssir kinn
kyngir snjónum niður.
Gáttaþefur gægist inn,
gamall er sá siður.

Desember

Huggulegt og hlýtt nú er
hvína ekki gluggar.
Dafnar myrkur desember
dansa langir skuggar.

Bank

Lúkan kalda lyftir vönd

ljót og hvít er mugga.

Veturinn með visna hönd

var að banka'á glugga.

Móðir Theresa

Kredit þó minnki á korti
og kjararáð dragi úr skorti
eins og Theresa forðum
er ei forsetinn í orðum
með taumlausu grobbi og gorti.