Ýmsar stökur

Draumaráðning:

Fjarska glögg er framtíð dökk,

flækjustigið lítið þó.

Allt til heljar, myndar mökk,

móða hylur gæfuþjó.

 

Fækkun sýslumanna:

Sýslupeyjar, einn og átta
aldrei týna skjölunum.
Víða'um land þeir vilja þrátta
vasklega í sölunum.

Nonni arkar utangátta
á að fækka hölunum.
Þá kom frétt í fréttatímum
og fárast yfir tölunum.

 

Grútur:

Ljóta grútinn þarf að þvo,

þurrka upp og vinda

Leggja í bleyti, lækna - svo

laskist siðarblinda.

 

Vísnagáta:

Liljuhvítt og ljósbrún skel.

Leikföng nokkuð snúast.

Glæsta fólkið grýtir vel.

Glás í búðir hrúgast.

Tvær vísnagátur

Fatnaður var faglegur.

Ferðast, veldur skelfingu.

Gulur drykkur gagnlegur.

Geymd er inn í hvelfingu.[1]

 

Höndunum í kulda, kær.

Kaka lítil heitir.

Lætur saman leiðslur tvær.

Losta drengjum veitir.[2]

 

Svar hér aðeins neðar

.

.

.

.

.

..

.

.

..

..

.

.

.

 

[1] Kóróna

[2] Múffa

Örfáar stökur

Nokkrar stökur sem hafa safnast saman undanfarna mánuði: 

Þorri:

Þó að kaldur Þorri sé
þiðna ég á blótum.
Súrar klaufir, sviðin hné
sinar ét af fótum.

Þegar sé ég þorrafat

þá verð ég mjög æstur.

Ginið opna, gleypi mat

góður er hann kæstur.

 

Hertur, reyktur, saltur, súr

sviðinn mat ég kyngi.

Fer í Þorra ketókúr

kátur þó ég spryngi.

Hálf sléttubönd:

Kraftur brestur latur les
línur þessar aftur.
Aftur þessar línur les
latur brestur kraftur.

Vísnagáta 1 (tilgáta að svari velkomnar í athugasemdum):

Veldur ísköld vetrarnótt,
vír úr teini grönnum,
læsir hurðum hart og mjótt,
hörð er böl í tönnum.

Lífskjarasamningur

Loksins komu kjarabætur

krydd er nú á fiski.

En hótelstjórinn hávært grætur 

í humarinn á diski. 

Vísnagáta 2 (tilgátur að svari velkomnar í athugasemdum):

Garp í grundu neyðir,
geymast krakkar reiðir,
vel hann gjarnan veiðir,
vætu framhjá leiðir.

Ærslabelgir:

Oft í miðju martraðar,
myndir ljótar detta,
er upp úr grasi allstaðar,
ærslabelgir spretta.

Júní:

Góð er tíðin, grænkar hlíð og gljúfrin víða.
Júníblíða, brumin prýða,
blómin fríðu landið skrýða.

Vísnagáta

Ég gerði obbulitla vísnagátu í síðustu viku ef einhver vill spreyta sig:

Úr voða bjargar, veitir grið.
Vaggar alda, fjöru við.
Flýtur yfir soðin svið.
Á sundi bráðu hlaut sinn frið.

Vísnagáta

Hvorugkynsorð 

 

Fimmta lýsing Fróni á.
Finna má í landi.

Ýmsir þarna afla spá.

Er á löngum brandi.

Vísnagáta

Vísnagáta, karlkyns nafnorð

Tvöfalt flagnar gæran glæst.
Glæra, en undir svell í leyni.
Segir eitt og annað næst.
Yfirborðin, þunn á meini.

Vísnagáta:

Upp á dæmin ýmis sannast.
Oft á skyggja prestar.
Lárétt við þær línur hrannast.
Lækna gjarnan pestar.

Gáta

Vísnagáta, sagnorð - mismunandi merking.

Verkar áfram brennda baun.
Blaðrar meir en fréttir.
Sviklaus fengust sigurlaun....
Sækir í, hann Grettir.

 

Vísnagáta

Ég orti stöku um daginn. Þegar hún er slitin úr samhengi, þá minnir hún á vísnagátu. Nokkuð auðveld:

Veltir knerri, vekur hríð
veldur þerri snjöllum.
Eins og hnerri oft á tíð
og ívið verri'á fjöllum.

Ratleiksvísur

Reyndu að rata eftir þessum vísum, staðsetningin er í Reykjavík en hver vísa vísar í ákveðinn stað innan Reykjavíkur:

1:
Þar er víðsýnt þar er hæð
þar má Golla  finna.
Þar var Boga þynnkan skæð
þar sést kreppuvinna.
 
2:
Skjólshús kennt við skáld og prest
skammt frá heppinn stendur.
Um daginn sást í góðan gest
sem gekk um Tíbetslendur.

3:
Enn við kennd þar, er ein gata
við óðalsbónda Hvítárvalla.
Ýmsir í skýlum einum fata
aðrir sitja, plotta, bralla.
 
4:
Rétt við Braut er blómanæði
blómstraði þar Sigur Rós.
Stytta sést, sá samdi kvæði
og selja vildi norðurljós.