Vell

Dropar skella okkur á
yfir hellast flóa,
kuldinn smellir koss á brá
kólnar vell í spóa.

Sú gula

Dagspart gekk sú gula braut,
grundir sleikti og mosadý.
Þvarr fljótt afl um þúfur hnaut,
þreytt þá fór í sumarfrí.

Til Tedda frænda

Bylgju sogar súgurinn,
silfruð togar gára,
kletta logar kvöldroðinn,
kyssir voga, bára.

Himnarjáfur hristir brá,
hljóðnar mávakvakið,
dropar skrjáfa, detta á,
doppótt sjávarlakið.

Djásnin

Ei í heimi allt þú færð,
engin þörf að gráta,
er þú djásnin ekki nærð,
upp á skápa - hnáta.

Græska

Ýmsir hafa opnað tjöld
alls staðar sjá græsku.
Rislág eru ræðuhöld
rúin allri gæsku.

Bygging

Til eru hópar fólks sem af vanþekkingu mótmæla byggingu húss:

Viskulaus vekja þau froska,
með vöntun á andlegum þroska,
blásvört með hróp
brjálast í hóp
því bygging ein heita mun moska.

Dropar

Himnarjáfur hristir brá,
hljóðnar mávakvakið.
Dropar skrjáfa detta á,
doppótt sjávarlakið.

Hentistefna

Býsna glennt er gjá og þrungin
gleið og spennt er nefna.
Lítill ventill virðist sprunginn
-vond er hentistefna.

Forsetinn staðfestir lög um veiðigjald

Hagvöxtur

Hugfangin heyrðum við forðum
um hagvöxt í tölum og orðum.

Lifnar því lund

og léttist um stund

er brauðmylsnan hrynur af borðum.

Staka um brennivín

Logi kviknar, líðan mín,
ljúf svo bliknar tregi.
Egils þykkni appelsín
í því stiknar brennivín.