Heilræðavísur

Þegar finnst þér þörf á ró
frá þrasi ansi slöku.
Þá veistu að þú færð smá fró
í feitri peruköku.

Ef vinnan truflar, vekur þrótt
svo verk'í undirhöku.
Þú af gleði getur sótt
þér góða peruköku.

Ef þig vantar þæga þögn
í þrautum lífs og vöku.
Þú gætir reynt að eta ögn
af úrvals peruköku.

Dóri á Kóngseynni

Ölduhæðir Halldór fer
hafsins skæð er leiðin.
Á Kóngsey æðir kringum sker
hjá karli glæðist veiðin.

Þó að aldan úfin sé
ekkert Halldór tefur.
Út í kaldann, karlinn sté,
Kóngsey valdið hefur

Staka

Sonur Ægis, rænurýr
ræður höggi kylfa.
Leonsí jafn skratti skýr
skríður aur með Gylfa.

Ráðherraraunir

Af Illuga höfum við ekkert að segja

allt er í stakasta lagi og fína,
því Orka er dásemd og ljúft af að leigja

og læðast svo saman í góðu til Kína.

 

Ráðalausir

Flestir af landi fara senn
fremur eykst hér kvíðinn,
því ráðalausir ráðamenn
ráðast hart á lýðinn.

Í moldarbeði

Vorboðar í vetrarlok nú vappa'á hlaði.
Snjóinn burt þó kannski kveði
kalt er enn í moldarbeði.

Limra

Áður fyrr eitrið menn sugu
ortu og limrur út smugu
en í neftóbaks tremma
tapaðist stemma
og stuðlar í fjarska burt flugu.

Vorið

Sólin gyllir sæ og grund
sumar hillir undir.
Vorið stillir vermir lund
vægja hryllings stundir.

Krot

Sjaldan alveg af mér brýt
enda nokkuð góður.
En á styttur krota krít
og krafsa fjandi óður.

Mæðir það en minnir á
miðlungs fuglahægðir.
Nag það mun ei nokkur sjá
næst er koma lægðir.

Vor

Enn þó kæli Kári sker
hvergi um það skeyti,
því ég veit að víst nú er
vor á næsta leyti.