Heimilisiðnaður vex.

Fúlt er að heyra um fjanda
og ferlegan áfengisvanda.
en búsið ei tefst
og í bílskúrnum hefst
framleiðsla á ljúffengum landa.

Færeyingar

Færeyskir fremstir nú standa
og finn ég til norrænna banda.
Þarna er þjóð
sem þvílíkt er góð
sem vill okkur leysa úr vanda.

Ekki allt svart.

"Rétt er það", röflaði króinn
og roðnaði grallaraspóinn:
"Ekki'er allt svart
ýmislegt bjart"
og horfði svo hreykinn á snjóinn.

Ljósblá limra

Í fjarska sé fallegar strendur
og félausar stöndugar lendur
mig langar á flakk
laus við það pakk
með ljósbláar kámugar hendur.

Trillan hans Jóns Ásgeirs

Í trillumoði maður býr
á miðju skeri sestur.
Kvótalaus og kapteinn rýr
krísa og aflabrestur.

Sumarbústaðaferð

Mælifellið freknótt gnæfir yfir
fölnuð grösin dansa kuldasalsa.
Haustfiðrildið hýmir enn og lifir
en hundskast senn í burt í þessum kalsa.

Því er gott að göslast út í potti
grilla kjöt í lopapeysu heitri.
Opna bjór með breiðu hýru glotti
og bergja'á miði, þessu ljúfa eitri.

(ort í Gestabókina að Steinsstöðum þann 12 október)

Fjárfestingaráð

Hér er fært í letur fjárfestingaráð frá Arnari (með smá útfærslu):

Ástandið er ekkert grín
örfátt bætir vanda.
Kauptu aðeins eðalvín
og aðeins drekktu landa.

(ort 9.október)

Horfðu'á björtu hliðarnar

Ævin er nú snúin
og öllum vonum rúin
kulnuð glóð í glæðum.

Í viskuvængjum lúin
veikbyggð gerist brúin
og gljúp í lífsins gæðum.

Bankaþrot

Kveljast grey því komin er víst kreppa
Uppí tré þeir aftur hoppa
aparnir með tóma koppa.