Götudómar

Syngur ómur haturs heitt
hér fer drómi'um engi.
En götudómar geta meitt
góða sómadrengi.

Bíó-etanól

Er sýning hefst ég sest í stól 
og sötra ropvatnsfjanda.
Oft ég bíó-etanól
þó út í kókið blanda.

Hundadráp.

Vöntun fá í vöggugjöf
vits og gæfurjóma.
Sveittir moka sína gröf
svefngenglar í dróma.

Fiskveiðistjórnunarkerfisvillulimra.

Togarar lífríkið tæta
en trillurnar ungseiðin gæta
á sjónum með króka
karlar sig spóka
og botndýrafánuna bæta. 

Að blogga ferskeytlu.

Að blogga þykir frekar fínt
en ferskeytlan því kvíðir.
Kvæðið innan alls er týnt
en þó finnst um síðir.

Múmíu fundur.

Í Egyptalandi varð undur
svo urraði'og gelti þar hundur.
Haldinn þar var
á víðþekktum bar
fjölmennur múmíu fundur.

Hugsunargangur hagfræðings:

Okkar viska'er kræf og klók
við kæfa getum floppið.
Þorskaflinn er bankabók
sem bólgna mun við stoppið.

Enginn veit.

Enginn veit hvað undir býr
öldum fyrir neðan.
Þref um aura, þrasið knýr
þorskur deyr á meðan.

Þorraþræll Afríkubúa.

Víst er bras og veröld dökk
varla gras upp stingur
kólnar lasin konan blökk
og kvef fær nashyrningur.

Skítaræsið heillar.

Lífstíð glötuð lykt á rann
ljótur skötuselur.
Í skítajötu skólpa hann
af skrítnum hvötum dvelur.