Rímbankinn

Fyrir þá sem ekki þekkja til, þá er rímbankinn algjör nauðsyn. Hann má finna á heimskringa.net

Þegar kemst á kvæðaskrið
kallar á mig Rímbankinn.
Ertu til að auka við
yfirdráttinn, kallinn minn.

Grímsey

Bæjarfellið fornt á brá
flóann Húna varðar,
varpar skrítnum skugga á
skrautið Steingrímsfjarðar.

HB Grandi

Sjúga fé úr sjónum enn

sægreifarnir kæru.

Munu éta seðla senn

svínin laus við æru.

Gleðilegt sumar

Fuglar syngja, fagnar kór
fljúga meðal kvista.
Sáust bæði sól og snjór
sumardaginn fyrsta.

Valhöll

Um Valhöll arka íhaldsmenn

aurugir með hroka.

Skítinn hafa ekki enn

út þar náð að moka.

Stökur

Nokkrar stökur síðustu vikna:

Hvergi leynist löggin hlý,
leit er ströng að bita,
starar syngja dirrindí,
dreyma sumars hita.

Seinfær Hellisheiðin er
helst til spillir geði.
Vanbúnir að vanda hér
vekja litla gleði.

Af útsýni lítil er ekla
og þó enn sjáist lítið til rekla
þá styttist í vor
og vex upp úr for
gróður, sem gýs yfir, Hekla.

Íslenskir vetrardagar

 

Snjórinn tætist tvist og bast,

tekur við smá logn, svo kul.

Einnig rigning, rok og hvasst,

rís loks fögur, sólin gul.

Frostburknar

Í morgun:

Út úr bílnum illa sá
mér elsku vinur, trúðu,
því frammí uxu frjálsir þá
frostburknar á rúðu.

Kuldi

Frostrós brynnir, kuldakast
kelur skinn á sveini,
nartar kinnar, nagar fast
nístir inn að beini.

Litla hagyrðingamótið og áramótastaka

Göngumaður ansi oft

er utanvega.

Yndislegt er útiloft

og útilega.

 

Mjúkan snjó og myrkrið svart

skal meta og vega.

Nauðsyn stundum einnig er

smá innilega.

 

Fjölgun okkar er ei grín

og eykur trega.

Samt er ávallt ansi brýn

smá uppilega.

 

-----

 

 

Allt er núna orðið hreint

áramótadraslið.

Hríðin, landið hefur skeint

hefst nú kuldabaslið.