Skrítið

Af hverju grípa þeir ekki tækifærið nú þegar það gefst og fjölga frekar ferðum og bjóða betri áskriftardíla, þ.e. ódýrari þriggja mánaða, hálfs árs kort eða árs kort. Á móti geta þeir hjá strætó bs hækkað verð fyrir þá sem taka bara strætó annað slagið. Þetta gæti kostað þá aukapening til að byrja með, en þegar litið er til framtíðar og fólk verður farið að nota strætisvagnana af einhverju viti, þá hlýtur að vera búið að ná fram sparnaði.

Þannig geta þeir notað kreppuna til að venja fólk við að nota strætó, enda er ekki vanþörf á. Það er allltof mikið um að fólk noti einkabíla (oftast einn í bíl) með tilheyrandi mengun, bílastæðavanda og umferðarhnútum (að ónefndu bensíneyðslu og innflutningi á því).

Ath, ég hef engar forsendur til að vita hvort þetta sé rétt hjá mér, bara hugmynd.

Strætisvagn er stuðið snjalt
gjör stöðugt magn í vetur.
Þá býrð til gagn og bætir allt
og borgin hagnast getur.

Dregið úr ferðum hjá Strætó en gjaldskrá óbreytt

Nýjar hetjur

Það hefur skort á hetjur undanfarið. Hér eru þá allavega komnar nýjar hetjur eða allavega endurnýjaðar hetjur, þ.e. Hetjur Hafsins.

Hetjur Hafsins

Berjast þeir oftast við brimskaflaseið
og blákaldir aflanum landa.
Nú áhöfn á Þerney vill eyða burt neyð
hjá afskiptum mæðrum í vanda.

Gáfu Mæðrastyrksnefnd ferðasjóðinn

Lausn á kreppunni.

Í nótt dreymdi ég frábæra lausn á kreppunni sem er að byrja að plaga landann og á eftir að herða sultarólina hjá mörgum, þó við séum vart farinn að finna fyrir henni að ráði.

Það versta er að mér var svo kalt að ég hafði mig ekki upp úr rúminu til að skrifa lausnina niður, svo lausninn varð aftur draumi að bráð.

Sjaldgæfa mér sýndi rausn
sinnið í heilamergi.
Í draumi fann ég fína lausn
en finn hana nú hvergi.

Bjartsýni?

Finnst mér stundum fjandinn laus
og finnast hvergi varnir.
En enginn mun hér enda'á haus
-aðeins víkingarnir.

Ástandið í þjóðfélaginu.

Magnast neyð og magnast böl
magnast eyðan langa.
Magnast reiði, magnast kvöl
magnast leiðin ranga.

Kominn á blog.is

Ég er hættur með síðuna 123.is/hoskibui og kominn á hoskibui.blog.is

Ég er að vinna við að færa eitthvað af efninu yfir á þessa síðu, en hún verður glötuð í einhvern tíma gæti ég trúað.

Kafsigling

Í góðærinu Geir varð ölur
gáði ei að sér.
Hann sigldi hratt þó sumar tölur
sögðu: þar er sker.
Af feikna afli inn sprakk kjölur
-aflaskip nú fer.

Í stýrishúsi áhöfn argar
og vill sinn hvítþvott.
Sljór samt Geir enn slefar, gargar
með slæman þynnkuvott.
Skipstjórinn ei bátnum bjargar
bráðnað er hans glott.

Böl má bæta.

Í mjöli er ansi vel mannað
af möðkum, það hefur margt sannað
og smjörklípu þræta
bölið má bæta
og benda á eitthvað allt annað.

Nokkrar vísur

Hérna eru nokkrar vísur búnar til síðustu 2-3 vikur. Fyrst ein um þá hugmynd að búa til safn um útrásarvíkinga:

Í setri margt þá má víst sjá
marga verðbréfsbúta
Fimmtíu tommu flatan skjá
og frumsmíðuð rándýr skúta
innréttuð með enskri krá
og eðalvíns flöskustúta.

Ljóst er að margir vilja saka Breta um ástæður kreppunnar. Eigum við að ráðast inn í Bretland?

Þá hertökum í einum hvelli
með háværu öskri og gelli.
Við land tökum strönd
með limru við hönd
og vinnum þá á heimavelli.

Hérna er ein vísa sem gæti hafa birst í morgunblaðinu, það er betra að lesa hana í samhengi við aðrar vísur sem ég birti ekki hér.

Við þeyting ljúfur Mundi mýkist
meyrnar karl og hverfur nauð.
Á mæðutímum meira líkist
mjúku smjöri on'á brauð.

Svona er ástandið núna:

Eftir situr skuldaskafl og skellur mikill.
Hvergi finnst nú lausna lykill.

Ekki er það mér að kenna hvernig ástandið er, en aðrir eru sjálfsagt betri í að dæma um það.

Jeppa stóra er ég án
í útlöndum ei hékk
aðeins saklaust lítið lán
og litla íbúð fékk.

Nú hækkar litla lánið ört
en launin rýrna hratt
Samt hef engar syndir gjört
né sopið kálið hratt.

Traust?

Hnekki beið en hlýtur traust
hvað á það að þýða?
"nú er komið hrímkalt haust
horfin sumars blíða"