Neysluhyggjan

Einhver mun sitt auka pund,
og eflaust sumir græða.
Já neysluhyggjan léttir lund,
en landið það mun blæða.

Kverkaskitan

Í morgun er ég upp við dogg
ofurhægt úr rúmi steig
hafði auman hásan gogg
í hálsi kverkaskitan seig.

Tvær stökur að vori

Kuldahrina hrets er frá,
helst nú linast takið,
upp úr sinu æða strá
enn er skinið vakið.

Kletta sólin kyssir enn,
kría'á róli gargar,
beinir njólar blómstra senn,
á blóðið góla vargar

 

Í bítið

Eldsnemma'í bítið er allskonar fólk,
sinn ávaxtasafa að dreypa,
og Cheerios karlarnir synda í mjólk,
sem sex ára risar fljótt gleypa.

Fimmti bjór

Yfirleitt er allt mitt þjór
aumt á tölvuletri:
En furðu vekur fimmti bjór
fjórði var ögn betri.

Óþjóðlegt

Kannski er það út í hött
og óþjóðlegt á fróni!
En Pizzu, gleypti prýðis, Hut
með pepperóni.

Brennivín

Lundin ákaft lifnar mín,
ljósgeisli á himni skín,
heyrnin skerpist, skugginn dvín
í skömmtum læknar brennivín.

Þó að lundin lifni mín,
lítt ég skil og hugsun dvín,
augun slompast, sljóvgast sýn
slafri ég í mig brennivín.

Það lítur út sem ljúfmenni
listagræna skrínið,
en mér á kjaft með kúmeni
kýlir brennivínið.

Bleikjufar

Þegar Flóans þykknar brá,
þýfðar glóa öldur:
Inn skalt róa ólgu frá,
svo ei þig krói skjöldur.

Ef að brjóta boðar hátt
ber þá  ljótur fjandi
þú skalt fljóta undan átt
upp að fót á landi. 

Þegar feykja bárur bát,
bólgnar sleikja kinnar.
Fleyttu bleikjufar með gát
færðu leikinn innar.

 

 

Vorið kemur

Gróður snjáður beygir bak
bylur dáðir lemur
frá fuglum hrjáðum heyrist kvak
hitinn bráðum kemur.

 

Tvær kosningaþynnkuvísur

Ormar hlaupa heim til sín
hoppa á þúfum tittlingar.
Sólin bak við skýin skín
skrækja'af gleði bittlingar

Ljós er skipting lands og gæða
læðist að mér grunur sko
að margir vilji gommu græða
og grilla svo.