Þorskaver

Þungbrýn gárast þorskaver,
þrumar Kári glæstur.
ýfir báru, breiður fer,
blæs nú fjári æstur.

Sjávardregill

Fýll á seglum svífur nær,
að sjávardregli þokast,
eins og regla tindatær,
tungl í spegli lokast.

Hádegismóar

Haninn í rökkrinu hefur enn skitið
og hænurnar spakar á þúfuna gjóa,
en flestar þær sjá þó að farið er vitið
og fjaðrirnar gisnar á kjúllanum sljóa.
En jafnóðum sekkur þó sorinn og dritið
í svörðinn og hverfur í Hádegismóa.

Kindarlegt

Blása vindar, bólstra slá
bólgna lindarvegir.
Milli tinda til og frá
tuskast kindarlegir.

Vetrarhlýindi

Fjarlæg hretin hrímköld þrá,
með hríðarteturs glýju,
að hylja betur stein og strá
og stöðva vetrarhlýju.

Langvinn norðanátt

Enn er dofinn Ennisháls
undir vofu lekur.
Hvenær rofar hann til máls
og hattinn ofan tekur?

Grútarbleyta

Hreystrið skreytta klípur kló,
kreppt og beitt er þvinga,
grútarbleyttur goggur hjó
grá og reytt er bringa.

Sílamáfur

Sól úr hvílu hærra rís
himna prílar rjáfur.
Í vetrarfýlu vorið kýs
vesæll sílamáfur.

Gárar sjó

Fjöru, þræðir, þaraskó,
þangið snæðir rollan.
Fjörðinn glæðir, gárar sjó
glæsta æðarkollan.

Hvítagaldurs máni

Mávaskvaldur, blíður blær
blikar faldur gráni.
Á himnatjaldi hnoðra slær
hvítagaldurs máni.