Nokkrar stökur

Tófuhjalli

Sætt var hræ við sjávarhlein
nú sit ég upp til fjalla,
fjaðrir tæti, bít ég bein
og bryð á Tófuhjalla

Sumarfríið

Sumarfríið er víst oft,

ætlað til að njóta,

tærnar allar upp í loft,

og í pottum fljóta.

Rugla

 

Semjum kvæði um sól og hross,

sjávaröldu, fugla,

verðbólgu og varakoss,

vænlegt er að rugla.

Lúsmý

Milli frekna, fann ég sjóð,

feygð mun burtu draga,

volgt og görótt gæðablóð,

gómsætt fyllir maga.

Hnattræn hlýnun

Vissulega viljum grið

vargöld burtu hrindum,

börnin munu berjast við

að bæta'úr okkar syndum.

Brúðkaupsafmæli, fjögur ár

 

Ber af öllum, fær við flest,

feikn er hennar máttur.

Konan mín er bara best,

nú byrjar fimmti þáttur.

Fýluvísur

Þeir sem dreyma drjúga hít

af dóli ferðamanna

fá víst aðeins aur og skít

og óbragð milli tanna.

 

-----

 

Yfir mönnum mæddur er,

að Manú grasið sleiki,

níðir aðra þursinn þver,

þurrt nú grætur Eiki.

Mórall yfir markaþurrð,

man hann fyrri siði,

um fyrritíða fótaburð

sem farinn er hjá liði.

Hryllir Eika hengiflug,

hans mun liðið jagast.

Eftir kannski áratug,

ætti samt að lagast.

Heilræðavísur

Viðkvæma þú vernda skalt,
vonlitla og snauða.
Hjálpin getur hundraðfalt
hindrað eymd og dauða.

Tærast mun og teljast best

tölvuna að slökkva,

líðan eykur, læknar flest

að labba um og stökkva.

 

Blóðug sporin bleyta for

blæðir fugl í kjafti.

Glæðist vor við gæfuspor

að geyma kött í hafti.

Ýmsar stökur

Draumaráðning:

Fjarska glögg er framtíð dökk,

flækjustigið lítið þó.

Allt til heljar, myndar mökk,

móða hylur gæfuþjó.

 

Fækkun sýslumanna:

Sýslupeyjar, einn og átta
aldrei týna skjölunum.
Víða'um land þeir vilja þrátta
vasklega í sölunum.

Nonni arkar utangátta
á að fækka hölunum.
Þá kom frétt í fréttatímum
og fárast yfir tölunum.

 

Grútur:

Ljóta grútinn þarf að þvo,

þurrka upp og vinda

Leggja í bleyti, lækna - svo

laskist siðarblinda.

 

Vísnagáta:

Liljuhvítt og ljósbrún skel.

Leikföng nokkuð snúast.

Glæsta fólkið grýtir vel.

Glás í búðir hrúgast.

Spáin

Spáin þín er spekingsleg

spennan mun oss þrúga

en þessi úrslit ætla ég

einfaldlega að trúa.

Tvær ótengdar stökur

Magga Skúla

Aldrei glepur geðið fúla
góð er lund þín tæra.
Mætar óskir, Magga Skúla
má þér alltaf færa.

 

Orðagjálfur

Þó ég geri glöp oft sjálfur

góða fólk, upp rísum.

Aðeins stundum orðagjálfur

inn'í bundnum vísum.

Tvær stökur í nóvember

Himnafeður hlaða í

harða kalda bakka,

ákaft senda gegnum gný,

gráa éljaklakka.

 

Varla er alltaf stanslaust stuð

en stundum birtist fagur

laus við glýju, grimmd og puð

gleymanlegur dagur.

Nokkrar stökur

Síðla veturs:

Vekur jurtir, vermir grund

vor í byrjun Góu.

Ég held að eftir hálfa stund

heyrast muni í lóu.

 

Hnígur volgur hnjúkaþeyr,

hneggja fákar glaðir.

Kvoðnar niður klakinn meyr,

klökkna fannatraðir.

 

Vorvísur: 

Nístir kul í norðanátt,

nötrar fölgul sinan.

Von er heit að víki brátt,

vonlaus kuldahrinan.

 

Sækir að þá sunnanátt,

svörðinn regnið vætir.

Grænka hólar hátt og lágt,

hlýjan fugla kætir.

 

Gaypride:

Fráleitt tel til falsvonar

að fjölbreytnin hér blífi

og allir geti allskonar,

unað sínu lífi.

 

Sumarfrí:

Svif ég inn í sumarfrí,

sæludaga.

Gælir við mig golan hlý,

grasið naga.

 

Haustdagur:

Styttast dagar, fölnar fold

fjársins kólna trýnin.

Lopapeysur hylja hold

hverfa trampólínin.

 

Munurinn á kúk og skít: 

Flokka mestallt má með lykt

-það margir ná að feika.

En blautleiki og breidd og þykkt

býr til glæsileika.

Smáfuglar

Heitt fæ kaffi og kakómalt,

og krás úr eldhúsinu.

En smáfuglarnir kroppa kalt

korn af gulri sinu.

Mikilvæg V

Virðing

Með vinnusemi virðing gefst 
en vart með kjaftahnoði.
Eitt er víst hún aldrei sést
í alnets gylliboði.

 

Von
Mæðir ársins maraþon

á  mörusundi.

Nýja árið vekur von
um vinafundi.

 

Vinátta 

Vinafundur magnar mund

ég mæta ykkur vildi.
Því kær er stund og lifnar lund,

ljúf með hláturmildi.